روبي ثاني

واحشني كلكم ومش عارفة لو لسة فاكرني، بقالي فترة مش بكتب ومختفية عن العالم الحقيقي والافتراضي :)

شغل و خطوبه وحاجات جديدة عليا مش عارفة بتحصل مع الناس ولا بس انا

المهم يا اصدقائي اتمنى انكم كلكم بخير

لو فاكرين انا مرة كتبت عن روبي و كان التعليقات مختلفة عن بعضها

المرة دي بقى عندي فضول اعرف يا ترى اي رايكم باغنية روبي الجديدة

اللهجة الي واخداها ومبسطاها من اهل الاقصر والاسوان ولا لبسها الي في شويه فلكلور وتراث ولا المكان المتصور في الكليب
مش عارفة حيكون في راي جديد عنها ولا هو هو مفيش تغيير
انا عني الاغنية عاجباني جدا
بجد نفسي اكتب كثير واقول حاجة اهم من الموضوع دة بس عايزة ادي لنفسي وقت وتركيز لما اكتب بحاجة اعمق من كدة للمرة الي جاية
اتمنى انكم بصحة وسلامة
واتمنى ان رائحة الليمون لسه بتفوح من المدونة بتاعتي
تحياتي
ليمو

ليلة في فبراير

بدأت الحكاية في ليلة كانت الشمس استولت على قلب القمر

البدر كان لونه اسود من جوه
بس دايره ضوء الشمس انعشته ونورته

النيل لونه بقه مش لونه

والدنيا لونها برتقاني

ليلة باردة من ليالي فبراير
والشوراع فاضية في ليالي القاهرة
مفيش صوت حد الا صوت قلبين

كانت صدفة

وكان قدر لينا نتقابل

وبعد اليوم ده نعيش العمر الي جاي كله مع بعض
ولو انا القمر انت الشمس الي نورت حياتي

الناس والحياة

كل يوم بيمر الواحد بيكتشف ناس

من اول نظرة مش بيستلطفهم

بيعاملهم بطريقة بايخة جدا

وفي ايام بتمر بنتعرف على ناس

بنحبهم ونتقرب منهم

بنشوف فيهم حاجات عايزين نشوفها

مع الوقت وصعوبات الحياة بنكتشف اننا كنا مش شايفيين

الي كنا فاكرين انه مش كويس وانه تافه

يلاقيه واقف جمبنا وقت الضيق تتصل بيه تلاقيه بيساعدك اكثر من حتى اي صديق مقرب وبيعرف ظروفك

مش بيلومك

مش بيعاتبك

بيفهم وبيتكلم معاك بهدوء

بيتقبلك

وتوقف مستغرب من الانسان دة الي يمكن في السنة او السنتين بتشوفه مرة

او من الشخص الي بتشوفه دايما بيسهر وبيتكلم بكلمات غريبة ومنفتح على العالم بشكل كبير

والي عمرك ماتوقعت انه بجد شخص من جوة مفيش زيه وانه بيفهم اكثر من اي شخص ماسك الشعارات والكلام وبيمثل على نفسه كمان مش على الناس

دي دعوة للناس كلها ماتحكمش على المظاهر

وتستنى للظروف الي بتبين الانسان بجد

وكفاية لوم يا ناس

وخلينا نعيش

وسلام للجميع

ليمو

الحياة صعبة وعويصة

هيلا هوب وهيلا ليصه لو تكون صعبة وعويصه

الاغنية بجد بسمعها وانا بجد تعبانة ومنهارة بس بتلاقي ناس واقفة جمبك وبكلمة واحدة تخليك تحس ان المشاكل والهموم راحت عنك

بقالي فترة مش بكتب، الحياة عندي اتقلبت 360 درجة وشكلها لسة حتتقلب اكثر واكثر على ما يجي اخر السنة

بس انا متفائلة والتغيير جميل واحنا اهو بنكبر ونتعلم

فيها اي لو اتعلمنا في سنه واحدة عن مليون سنه

بنبقى برضه احسن من غيرنا

عشان لسه الصبح بنصحى ونكون بصحتنا وحولينا اهلنا وبنلاقي اكل

الحمد الله

ليمو :)

سحر مصر

حكايات بتمر علينا

بتمشينا في وسط البحر، راكبين سفينة

بتاخدنا مع الموج لفوق

وتنزل فينا لابعد مدينة

مليانة شوق وحنين، لمصر الحبيبة

شعور غريب بيكبر فينا

ويارب يبقى لام الدنيا

بعذبها و سحرها

لناسها وترابها

وتبادلنا حبنا ليها

كلمات واحساس ليمو

2/4/2008

اقول اي لمصر

مصر

مش عارفة اقولك اي

بقالي فترة مش بكتب وعايزة اكبتلك انت بس

بنيلك وشوارعك وزحمتك

بناسك و اهلك وكل حاجة فيكي بحبك

ومهما بيحصلي منك او من اي جزء فيكي مش بزعل

دة الي محيرني

بلتقي بناس فيكي منهم الي بيتغيرو ومنهم الي بيكدبو ومنهم الي بفترة قصيرة بيبقو اعز الناس ليا

مش حتكلم عن الرحلة المرة دي

بس عاوزة اقول شكرا لكل شخص اتعرفت علي في مصر سواء كان من المدونين او من الناس الطيبة في وسط البلد

وبعتذر جدا من يامن ومحمد العزب عشان ماقدرتش اشوفكم في اليوم الي اتفقت اشوفكم بي

بس في اليوم دة كنت تعبانة وعيانة جدا جدا فضلت نايمة طول اليوم دة وثاني يوم كنت راجعة الاردن

عارفة ان ناس كثيرة زعلانه مني عشان ماكلمتهمش اول مانزلت بس بجد يا جماعة الوقت ماكنش كفاية خالص

في الفترة دي اول مارجعت مصر كنت عيانة وبعدها بيومين استلمت شغل جديد الحمد الله بس ضغط الشغل كثير ومعنديش وقت لنفسي

في النهاية بحب اشكر بجد رندة وعلى كل شخص عرفتني علي والي بقو عائلتي الثانية في مصر بالنسبة ليا

كانت ايام غريبة سريعة وفيها تعب بس اتعلمت حجات كثيرة في وقت قصير

تحياتي

ليمو

ليمو في ساقيه الصاوي

مساء يوم السبت الساعة 8.30 حفله ل عمر خيرت في ساقيه الصاوي
ليمو حتكون هناك
نراكم
:)

حكايه طويله بس نازله مصر يعني نازله مصر ان شاء الله

المفروض اكتب عن شباب مصر بس قبل ماكتب عنهم انا حكتب النهارده عن حاجه بقالي شهر بحاول اعملها
والحاجه دي اني انزل مصر
بقالي شهر بفكر انزل مصر قبل ما ابداء بشغل جديد
اصلي سبت شغلي القديم وبقالي شهرين تقريبا من غير شغل رسمي
المهم كان عندي مشكلتين في نزولي لمصر الاول هو ان فلوس مافيش كفايه عشان انزل مصر
الثانية وهي اقول لبابا اي
في العاده بنزل مصر وبكون مع حد بس المره دي نازله لوحدي مع اني نزلت مصر مره لوحدي لمده اسبوع شغل بس بالنسبه لبابا ده شغل
قلت ماشي انا اشوف شركات السياحة واشوف موضوع الفلوس وبعدين اقول لبابا وفعلا رحت على شركات السياحه ويااااااااااااسسسسسسسسسسسسسلام اي الاسعار الجميله دي حاجه اي تجنن وتخلي العقل يطير
قلت ماشي مش مشكله ناخد حاجه على قد الحال ولما بدئت اشوف اليوم الي حنزل في وعاوزه اتاكد اني في حجز للطياره اصل الطيران سواء كان على الملكية او المصريه على مصر دايما محجوز وعليه ضغط
المهم كل الايام الي كنت عاوزة انزل فيها مافييشششششششششششش خالص حجز
قلت ياني وبعدين
وليمو عقلها اوقات جزمه وانا عنييييييييده جدا وخصوصا لما ابقى عايزه حاجه ويبقى عايزاها مليش دعوه

رحت قلت لبابا وبكل صراحه اني حشتغل الشهر الجاي وده بيعني اني مش حيكون عندي اجازات و ان هو عارف قد اي انا مخنوقه بقالي فتره ومحتاجه اغير جو قالي ماشي وبعدين

قلت انا لازم اسافر طبعا مش حقول شكله اتغير ازاي

قالي فين

ضحكت وقلت مفيش غيرها

قالي مصر يادي مصر والي عاملاه فيكي

حتنزلي مع مين

قمت قلت الحاجه الي صدمته

قلت لوحدي قالي ازاي يعني

قلت عادي

قال مافيش قلت ازاي يعني مفيش اقنعني

دي مش اول مره اسافر لوحدي

انت سمحت قبل كده اني اسافر على تركيا لوحدي وسافرت على البحرين ومصر في شغل لوحدي

حيفرق اي اني اسافر لوحدي سياحه وتغير جو عن الشغل يعني

مفيش حد حياكلني وانت عارف انا بعرف مصر وناسها اكثر من اي حد يعني حد يضحك عليا او ياخدني في دوكه مفيش من الكلام ده

لازم توافق

المهم الموضوع اخد وقت طويل من الكلام وبعدين قالي ماشي روحي

ياااااااااااااااااااااااااه انا بقى كنت فرحانه وثاني يوم نزلت احجز قبل ما يغير رأيه
رحت قلبت الدنيا على الفندق الي اعرفه ان كويس في الهرم وكان اول مره نزلت فيها مصر في سنه 2002 نزلت في وبحبه جدا قلبت الدنيا على شركه بتحجز في ولقيت الشركه ولما وصلت للشركه كان السؤال اي يوم نازله قلت لهم يوم الاربعاء 20-2 قالو ماشي نشوف الطياره والطياره اي فل يا باشا مفيش حجز لازم ادفع زياده كثييييييييير عشان لو عايزه انزل في اليوم ده واطلع على درجه عاليه
قلت ماشي اعمل اي بقى انا عاوزة انزل يا جماعه طيب اتفقنا نشوف الفندق قوم اي الفندق فل مفيش حجز ياباشا
يادي القرف الي انا في
هم لي مش عاوزين انزل مصر بس
والمشكله اني لو مانزلتش مصر في الوقت ده مش حنزل مصر لفتره طويله وبصراحة انا مخنوقة و محتاجه انزل جدا غير اني كنت عاوزة انزل مصر على راس السنة وماقدرتش واتجننت عشان انزل مصر في عيد ميلادي وبرضه مانزلتش و كان يوم مايعلم بي الا ربنا واتخنقت بزياده
وفي حاجه مهمه على اول الشهر الجاي ان شاء الله حبتدي شغل جديد يعني مفيش اجازات لفتره طويله
يعني قصة طويله جدا
ربنا يخليلي ناني شافت حاله الاكتئاب الي انا فيها قامت قالت طب اسمعي انا بعرف شركه سياحة ممكن تعملك اوفر كويس و ممكن معاهم نلاقي حجز طيران اصلهم بيحجزو على المصريه قلت ماشي مع اني مش بحب طيران المصريه مع احترامي ليهم
ركبنا العربيه ورحنا ولما وصلنا شوفنا كل الامكانيات والحلول والانواع المختلفه من الفنادق عشان الحجز واخيرا وافقت على حاجه مش عجباني بس اعمل اي ده احسن حاجه والحمد الله موضوع الطياره كمان لقينا حجز
تمام يا باشا احجز وزبط وانا كمان ساعتين حارجع ومعايا الفلوس
وفعلا روحنا انا وناني وجبت فلوس وجبت جواز السفر من البيت لقيت ناني مش واكله حاجه من الصبح عملنا اكل
ورجعنا نزلنا عشان ناخد الحجز وندي الراجل الفلوس واحنا ماشيين بقولها يا بنتي لي نمشي من الطريق دي انا عندي طريق ثانيه اسرع واحسن وفعلا لفيت للجهة الثانية من الشارع ودخلت شارع فرعي
وكنا بنتكلم عن العربيات واسعارها ولسه بقولها يا بنتي دي عربيه مازدا المعفنه الجديده بقت ب 18 الف ونص اردني تصوري
وقبل ما نوصل مكتب السياحة بدقيقه واحد
دججججججججججججججججججججججججججججججججج
عملت حادث بالعربيه
والعربيه الي عملت الحادث معاها كانت اي ......... كانت مازدا الجديده ولونها اسود
المشكله اني بجد ماشفتش العربيه خالص
نزلت من العربيه ولقيت شباب عيال نزلت بقول للشب هو انت سايق على سرعه اي انا ماشفتش عربيتك خالص
هو قام بقول انت الي مش شايفه اشاره قف
هو بصراحه بيني وبنكم انا وقفت على اشاره قف بس لما قطعت الشارع ماكنتش واخده بالي من الجهه الشمال والعربيات من هناك خصوصا ان الشارع ده حيوي جدا وانا بطريق فرعي
ما علينا المهم لازم ننده الشرطه الشب كلم الشرطه وده حياخد وقت
رجعنا على العربيه انا وناني والبنت يا حرام ظهرها بيوجعها خصوصا ان الجهة بتاعت الحادث كانت من عندها
بقينا نتكلم ونفكر حنعمل اي
انا يا دوب معايا فلوس للرحلة ولما تيجي شرطه المرور واضع ان الحق عليا انا الي حدبس بحاجه اسمها الكروكه عندنا غير المخالفه ويمكن كمان تصليح العربيه بتاعت الشب
يا لهوي السفره حتبوز يا جماعه
طبعا كل ده حصل وماكلمتش حد من اهلي
وجت اخيرا شرطه المرور راجل بجد محترم جدا جدا واحنا في الاردن والحمد الله الامن والشرطه بجد ناس محترمين جدا ومعروفين بانهم احسن ناس في الوطن العربي في الخدمه ومن غير ما ياخدو رشاوي او اي حاجه بيخدم الواحد بكل انتماء ولباقه
المهم الراجل قال الحمد لله على سلامتكم حصل اي
اتكلمنا جاه وقالي طب الرخص لو سمحت وقال يا ليمو الحق عليكي قلنا طيب حيحصل اي دلوقت اصل اصل اهلي مش هنا وانا لوحدي اعمل اي بقى
قالي احنا اهلك هنا ماتخفيش انت مش حتدفعي حاجه الا مخالفه خمسين دينار وبصراحه هو المفروض ادفع اكثر بس الحمد الله
والراجل حيصلح العربيه على حساب التامين بتاعه عشان تامينه شامل
بعد نص ساعه اشوفكم في مخفر شميساني
يا سلام حروح المخفر يا جدعان
كده قلت لازم نقول للاهل بقى كلمت اختي وقلتلها قامت قالت وانت بابا لسه مش عارف حاجه قلت لا
فقلت ماشي حكلمه
كلمت باب وبهدوء قالي ماشي بس هو العربيه حصلها اي وفين
قلت من الخلف والجمب شويه قالي كده الغلط علي ماتخليش الغلط عليكي
قمت وبادب قلت لاء يا بابا انا كنت على طريق فرعي و مشيت عن اشاره قف يعني الغلط عليا
طبعا تعرفو الشعور الي هو وانت بتكلم ابوك على التلفون وتحس وشه مكشر
هو كده الي حصل
المهم رحنا المخفر وقالي الشرطي يا ليمو انت مذنبه عندك اعتراض قلت لاء قالي ماشي عليك مخالفه قطع اشاره قف
هههههههه تضحك مش كده دفعت المخالفه والمشكله دي فلوس الرحله الي يا دوب قدرت اجيب فلوسها
بس مش مشكله رحت حجزت بس الفلوس ناقصه الخمسين دينار
اعمل اي بس
بس الحمد الله كل حاجه سليمه دلوقتي
في حاجه جديده
دلوقتي وانا بكتب البوست ده والي حينزل كمان دقيقة على المدونه في الاردن جاي عليها عاصفه ثلجيه جامده جدا المفروض تيجي الاردن من يوم الاحد وجت النهارده
مش عارفه اي الي بيحصل يا جماعه انا عاووزة انزل مصر حرام عليكو
هو في حد بينبر عليا ولا اي
انت مش عاوزين ليمو تيجي مصر L
ربنا يجيب العاصفه دي على خير ويوم الاربعاء تكون العاصفه دي راحت عشان الطيران يبقى كويس
وادعو اني انزل مصر بالسلامه

فرحانة ليهم وبيهم

الي يعرف ليمو ومتابعها من اول يعرف اني بحب نجيب ساويرس بالهبل

وانه بالنسبة ليا انسان وقدوة في الحياة

مع اختلاف اراء الناس عليه ويمكن في حجات مش بحبها فيه بس في حجات كثيرة بتخليني كل مرة ابقى اني فخورة بيه مع اني مش مصرية

بس كفاية ان في حد زي نجيب في الوطن العربي بحب بلده بالشكل دة وبيعمل ليها حجات عشان تبقى احسن
الي بحبو فيه انه مش بتاع كلام وخلاص

نجيب مع حفظ الالقاب بيشتغل وبيدي كثير وبيتكلم قليل ودي سمة قليل تلاقيها في عالمنا العربي ودة من اكبر الاسباب الي عاملة فينا التخلف الي احنا بيه

البوست دة عشان

OTV

سنة كاملة بتحقق فيها نجاح هايل ومواضيع وبرامج بتخليك تقول انك اكيد اكيد في مصر حتى لو انت بعيد عنها

تحس نفسك معاهم ومش انك خارج الشاشة

مش حقول كثير عشان مهما قلت مش كفاية

كل الي اتمناه لنجيب في اي مجال النجاح وانه يفضل كدة بيستحمل الي الاشعات والحاقدين

ربنا يكون في عونه

في مجموعة شركات اوراسكوم وقناة او تي في مش بيشغلو الا مصريين والحاجة دي بيضايقني عشان نفسي اشتغل معاهم بس معلش بقى

المصريين اولى ، وبجد محتاجين للشغل كفاية البطالة والحياة الصعبة

انا عايزة بس اقول حاجة

تفتكرو لو نجيب واخوانه شغلو ناس من برة مصر

كان حال البطالة والشباب حيكون اي؟!؟

تحياتي واحترامي الكبير والعميق وحبي لنجيب

====================================================

حتكلم كمان عن شخص ثاني مصري كمان فخورة بي جدا

مع اني للوقت دة مش مصدقة ان في مصري في الدنيا دي بالهدوء والاحترام والشغل والادب وكل الصفات الجميلة الموجودة بالحياة

مش بقصد ان المصريين مش كوسيين بس الموضوع ان لازم يكون في حتة بالنص كدة مش كويسة

الشخص الي انا فخورة بمعرفتي بي وبقالي اربع سنين بعرفه

والغريبة اول مرة اتعرفت بي كان في اجتماع وكان الشخص دة بيشتغل في دولة في الخليج وماكنتش عارفة انه مصري

كنت ببعت ايميلات ليا وبيبعتلي عشان رعاية لشاب صغير وطموح

كل دة على الايميل

ومش حقول قد اي الايميل كان مهذب و بيدل على شخص بخبرة محترمة وشغال جامد جدا

في 27-1-2004

جيه الاردن

كلمني شخص

رديت وقلت: الو ايوة

هو : ليمو

انا : ايوة

هو : ازيك انا ....... بتاع الرعاية

طبعا انا فضلت ساكتة ومش عارفة اقول ايه

هو : الو في حاجة

انا : مفيش هو حضرتك مصري؟!ء

هو : اه

طبعا انا كنت طايرة من الفرحة

يعني واحدة زيه بتحب مصر بالجنون دة والاقي حد باللباقة والتحفة دي بكلمني ويبقى مصري اكيد حفرح جدا

مسكت نفسي عشان مايصحش

انا في شغل اكون زي المجنونة

اتكلمنا عادي وحددنا موعد للاجتماع وخصوصا ان الاجتماع لشركة كبيرة

ثاني يوم رحت الاجتماع وكنا تقريبا 3 اشخاص في الاجتماع غير المصري الجميل ووشاب الموهوب

يعني بقينا خمسة

مش حقولكم لما شوفته كنت عاملة ازاي

لازم امسك نفسي واتكلم بلهجتي مش بالمصري

واكون هادئة و مركزة عشان اعرف هو الموضوع يستاهل تدفع الشركة دي لرعاية الشاب ولا لأ

غير انه مصري، كمان كان شعره رمادي وانا بموت في الشعر الرمادي

كنت مش بتفرج علي الا للضرورة

وهو كمان عادي ووبيتكلم بثقة وهدوء ما شاء الله

وبصراحة كان عملي جدا ومقنع جدا

المهم خلص الاجتماع

من يومها بقينا اصدقاء

بس اصدقاء بيتكلمو مع بعض في السنة يمكن مرة واحدة

ومن سنة 2004 شوفتو مرتين بس وامبارح شوفتو على التلفزيون

وعشان ما اتكلمش كثير

الشب دة للاسف لو فضل في مصر مكانش حيبقى الي هو في دلوقتي

اشتغل كثير وتعب جدا جدا

بنى نفسو من الصفر ومش بنام الليل وبيشتغل بجد ومش هزار خالص 24 ساعة

مافيش اجازات خالص حتى لو كان عيان . دايما لما في الاعياد والمناسبات بسمع صوتو بقولو يابني ارحم نفسك حرام عليك

بيقولي يا ليمو انت تعرفني اكثر من اهلي بلاش الكلام دة خلاص انا كدة مبسوط

ربنا يكون معا

بس انا اتكلمت كثير عنه وللاسف مش حينفع اقول اسمه عشان هو مش حيحب اني اقول اسمه

بس فخورة بي عشان هو مصري

صحيح مش في مصر بس رافع اسم مصر فوق

هو دلوقتي وفي السنة دي بقى مدير لبطولات مهمة جدا في العالم مش بس في الوطن العربي

بجد انا فرحانة وفخورة بمعرفتي بي كانسان صديق ومصري

يا رب بس كدة ربنا يهدي ويخف الشغل شوية عليه ويهتم بنفسه شوية

================================

انا كتبت عن نجيب والشخص دة في بوست واحد يمكن عشان الاثنين مصريين وبشتغلو كثير

بس من دلوقتي وماتزعلوش مني انا حكتب بوست عن شباب مصر قريب

اتمنى اننا نكون موضوعيين في الي حكتبه المرة الجاية وماحدش يزعل مني

خلينا موضوعيين ونفكر بالعقل قبل ما تحكمو على الكلام الي حيجي في البوست القادم

سلام وامان ليكم

:) ليمو

سنه 27 في 27/1/2008

النهارده عيد ميلادي

مش عارفه شعوري اي

مشاعر غريبه جدا

امبارح كان يوم خرافي

كنت مبسوطه بعدين تحول الانبساط لاكتئاب وبعديها لحاله جنون ونعنشه ورقص

عملت لنفسي في اخر الليل حفله لوحدي

فتحت على قنوات الاغاني التافهة وبقيت ارقص و على وسطي لبسط اشارب جبت من مصر وجننت اختي في رقص هبل وتخويت اشي سلو واشي رقص شرقي واشي رقص اجنبي يعني هبل

عملت حفله ليا لوحدي من العاشره باليل حتى الثانيه عشر تقريبا

بعد كده مش عارفه السخرية دي

اول شخصين كلموني كانت مطلقين

حاجه غريبه مش كده

شكلو على ال 27 العمر ده يعجب الناس المطلقه

ما علينا

المهم من الصبح وانا بستقبل التلفونات والمسجات مع اني بصراحه الي بعت مسج بقولها بصراحه بحسها بايخه جدا

يعني كلو يوم في السنه طب يعني كلموني يا جماعه

ما علينا

المهم الشعور غريب جدا مع اني كنت من سنوات بستنى اليوم ده عشان مش حيحصل ثاني ان عمري يكون 27 ويكون اليوم 27/1

وانا بحب رقم 27

يا رب يكون خير عليا وسنه جميله مع اني كل دقيقه بتمر بمر عليا بحس بشعور غير الثاني

مره فرحه مره مش طايقه نفسي ومره شعوري غريب مالهوش معنى

كل الناس حوليا بس بحس نفسي وحيده

الحمد الله على كل شئ

والحمد الله عشان حولي اصحاب بحبوني

وصلني ورد جميل جدا مع لعبه

وورد ثاني احمر حاجه مفيش اجمل من كده

عارفين بفكر تفكير مجنون اني انزل مصر قريبا عشان بجد مخنوقه

يا رب بس الموضوع ينفع واحتفل بعيد ميلادي حتى لو الوقت فات

بس بجد محتاجه لوقت جنان

معلش يمكن قلبت الموضوع غم ونكد بس يعني ده احساسي في الوقت ده

يمكن كمان دقيقه يتغير حسب الي بيحصلي في اليوم الغريب ده

ليمو محتاجة ليموناضة

والله حاجة توقع من الضحك

ليمو يا جماعة محتاجة ليموناضة

بقالي 4 ايام في السرير مش بتحرك منو خالص

مريضة جدا وواخدة دور برد جامد جدا

صوتي مفيش المطربة الصاعدة ليمو وصوتها الجميل اختفى:)

طول اليوم بشرب حاجات سخنة وادوية جمب السرير بكميات غريبة

حاجة للحلق وحاجة للأذن وحاجة للأنف وفيتامينات و خافض للحرارة

يعني ربنا ما يورايكم ويبعد عنكم المرض :)

معلش مش بعلق على البوست الي كان قبل كدة بس قلت لازم اجي واكتب عن المسخرة الي انا فيها

بس في حاجة غريبة لما واحد من اصدقائي في مصر عرف اني مريضة قالي يا بنت انت محسودة مع انو عمرو ما قال ولا فكر بالطريقة دي؟

بس المهم الله اكبر على كل عين وخمسة وخميسة في عين الحسود

بسم الله الرحمن الرحيم

قل اوعذ برب الفلق من شر ما خلق ومن شر غاسق اذا وقب ومن شر النفثت في العقد وشر حاسد اذا حسد

صدق الله العظيم

طب اسبكم دلوقتي

وخلي بالكم من صحتكم بجد الصحة اهم حاجة في الدنيا ويا رب ما تشوف شر ولا مرض ليكم او لأي حد بتحبو

سلامات بقى

اقوم اعمل كوباية ليمون اشربها

ادع لي الشفاء ان شاء الله

حياة جديدة

ليمو 2008

انسانة جديدة بتحافظ على صفاتها الي كانت قبل كدة فيها بس مش بتتعامل مع كل الناس بنفس الطريقة

لسة هي المنعنشة والمفرفشة بس الي بتفكر في عقلها اكثر من قلبها

حياة عملية و اسرية وعاطفية جديدة

اتخذت قرار اني ما استعجلش حاجة

اعمل كل حاجة على نار هادية خالص وافكر واوزن الامور واختار الي احسن

ولو ملقيتش الاحسن او حسيت في شك من ناحية حاجة او شخص اتعامل بطريقة عادية جدا

عارفين مع اني بقالي سنين كثيرة بتعلم وبشتغل من عمري 19 سنة ومريت باوقات صعبة جدا بس السنة الي فاتت علمتني كثير

يمكن السبب هو المدونات ويمكن اني بجد كبرت وعقلت بس برضو ليمو حتتمسك بنعنشتها وطيبتها بس مع الي يستاهل

متاسفة اني مش بكتب بقالي فترة وعاوزة اشكر كلي الي اطمنو عليا سواء كلموني او بعتولي مسج او كومنت

بس برتب اولويات حياتي وراجعة بحجات جديدة

تحياتي المنعشة بشكل جديدة ومعطر برائحة زهر الليمون الي يا رب تفوح في كل قلب يمر على المدونة :)

ليمو

ملاحظة: اغنية المدونة بتعبر عن ليمو الجديدة