Sunday, December 23, 2007

وادي فينان















عيد من نوع خاص


عيد مش عارفة اقول علي اي


المرة دي معلش مش حتكلم بالمصري هي بس الافتتاحية بتاعت البوست دة بالمصري
مش معقول احكي عن الاردن واكتب مصري
العيد هذا كان في الاردن اول مرة من 6 سنوات بقضي العيد في الاردن


صحيح مش في عمان ومش مع الاهل والاقارب
بس في الاردن
بلدي الي مش بتكلم عنها بس دة مش بيعني اني مش بحبو ولا اني مش منتمية إلو

كنت في منطقة في غاية الجمال والابداع
منطقة اول مرة بزورها
في الاردن هنالك جمعية تعنى في حماية الطبيعة البرية اسمها الجمعية الملكية لحماية الطبيعة
بتعمل محميات ومخيمات في مناطق معينة بتحافظ على التربة والطبيعة والاشجار والازهار النادرة والعصافير يعني الحيوانات بشكل عام
المتعارف علي ان المحميات بتحافظ على الطبيعة ومش بيزورها الناس او لو الناس زاروها مفيش مكان يجلسو في
فتم الحصول على منح من الخارج لدعم هذه المشاريع وبنفس الوقت امكانية توفير وبناء مكان يتلائم مع طبيعة الاماكن دي بطريقة لا تؤذي طبيعة المناطق
في الاردن بالنسبة ليا انا زرت محمية ضانا والتي هي في الجنوب وهي محمية رائعة الجمال لك ان تكون بين الجبال والوديان وان تاخد خيمة لتنام فيها او ان تنزل في بيوت من طين
بس للاسف البيوت من طين دائما محجوزة من قبل الاجانب وخصوصا الفرنسيين
مش مشكلة بس استمتعت هناك
اما المحمية الثانية التي قمت بزيارتها هي محمية وادي رم
هي عبارة عن خيم بين جبال رم الرائعة والتي بين جبالها الكثير من الافلام العربية والاجنبية صورت بيناها
هنالك متعة التسلق والتزحلق على الرمال ومشاهدة مغيب الشمس وتغير لون الجبال من البني الى الوردي اي اللون البرتقالي
وعلى فكرة رم لا تبعد كثيرا عن مدينة البتراء الوردية والتي هي من عجائب الدنيا السبع
اما المحمية الجديدة والتي قمت بزيارتها هي محمية وادي فينان
اول مرة في حياتي اكتشف ان هنالك منطقة في جنوب الاردن اسمها فينان وقريقرة
وهي قرية صغيرة في جنوب الاردن بين البحر الميت والعقبة
ايضا هي واقعة بين جبال جميلة جدا وتبعد عن محمية ضانا مشيا 6 ساعات
وبين محمية ضانا ومحمية فينان هنالك محمية وادي الموجب
للاسف هذه المحمية لم ازرها بعد اذ انها تتطلب لياقة بدنية عالية لصعوبة تسلق جبالها مع ضرورة السباحة في نهرها الذي تسبح عكس تياره
بس في الصيف القادم ان شاء الله سوف اقوم بهذه الرحلة اي وادي الموجب
نرجع لوادي فينان
في الطريق كان في طيور نادرة وجميلة لونها اسود صغيرة وفي منتصف جسمها خط عريض لونه ازرق مخضر
تصل اي وادي فينان بعد اخر نقطة تفتيش بعد اول يافطة مكتوب عليها قرية قريقرة ووادي فينان ترحب بك
تدخل من الطريق الرئيسي على الجهة الشمال وبعد 22 كم تجد مكان الاستقبال
اذا كانت سيارتك فوروييلد تستطيع ان تكمل لمكان الاقامة اما اذا كانت سيارتك صغيرة فالافضل ان تبقى في مكان الاستقبال وان تستقل سيارة فورباي فور من قبل الجمعية لحماية الطبيعة لتوصلك الى مكان النزل اي مكان الاقامة
بعد مرور نصف ساعة تقريبا على طريق وعرة وترابية تجد امامك مبنى من طين على شكل قبب وحيد قابع بين الجبال لتجد نفسك في نُزل وادي فنان الطبيعي
بصراحة الكلام كثير ومش عارفة شو احكي
بس بصراحة زي الاردن ما في بلد
حتركم مع الصور ولو حد عايز اي استفسار انا جاهزة

=============================================

على فكرة الجمعية الملكية لحماية الطبيعة شعارها هو عزال المها البري الي هو متواجد في محمية الازرق وهي محمية تركيزها على الكثير من الحيوانات المنقرضة وخصوصا عزال اللمها الي عندو معزة جامدة في قلبي وخصوصا في رسمة العيون بتاعتو
معلومة عن وادي فنان: وادي فنان مافيش اي وسيلة انارة في الا الشموع مافيش كهرباء خالص

كل شئ في على اشعة الشمس او الشموع بيشتغل كل الانارة في بالليل شموع و التدفئة هي الحطب


الاكل خضراوات بس مافيش لحوم او دجاج


حاجة كدة جميلة وهادئة وتخليك صافي الذهن وتفكر بجد في نفسك وتحب الحياة من ثاني وجسمك يكون نظيف من الداخل والخارج
على فكرة رواية شعور غريب الي كان متابعها معايا في مدونتي الثانية قوس قزح بقيت كبيرة والجو الي كنت في خلاني ابدع واكتب حاجات عمري ماتوقعت تكون بهذه الطريقة عشان موضوع الرواية كان ماخد منحنى ثاني وفي الفترة دي اخد منحنى ثاني خالص بس مبسوطة جدا جدا بالنتيجة :)

على فكرة نسيت محمية ثانية هي في عجلون هي شمال الاردن في منطقة جبلية وعالية وفيها ثلج في الشتاء يعني في الوقت دة عشان هيك مش بتشتغل الا في الصيف
بس كثير حلوة
تحياتي :)

Saturday, December 8, 2007

وحشتيني يا مصر



وحشتيني يا مصر

ولأول مرة من 6 سنين حقضي العيد بعيد عنك

بعيد عن اعز اصدقاء ليا

الي معاهم بنسى نفسي وبحب الدنيا من جديد، وبحس ان لسة في خير فيها

وحشني زيما اخر العنقود في الشلة بتاعتنا، مع انه دايما بيتمئلس عليا بس من غيرو مش بعرف اتبسط مع اننا دايما نتخانق

زيما انسان طيب جدا، مزز الجامعة بتاعتو مش سايبينو في حالو، ربنا يكون في عونو

واخد البكالوريوس دكتوراة ودياما بقولو يابني خلص بقى انا زهقت عنك

بس بجد هو بقالو سنتين بيدرس بجد بس مش عارفة الحظ معا عامل كدة

وحشني ميدو اخو الصغير، دة الكتكوت بتاعي

دايما بنهزر ونعمل افلام مع بعض على زيما ودايما بيوقف معايا لما زيما يغلس عليا

وحشني اتش وواحشتني طيبتو وحنيتو بس منها لله بقا القروبة الي كان حيتجوزها

بقالي فترة مش عارفة عنو حاجة بس بطمن علي من الشلة

وائل الي هو سبب اسم ليموناضة

في الحقيقة هو لما عرفنا بعض كلنا كان زيما دايما يوقع او تحصلو مصيبحة فقام وائل اطلق عليا اسم وش المصايب

وانا قمت مقهورة منو جدا وهو كان لابس جاكيت اصفر قلتلو طب روح وانت زي الليموناضة :)

بس قبل ما افتح البوست قلتلو اخدت اسمك معلش

وائل شب طموح جدا، دماغ ما شاء الله علي بيعمل مليون حاجة بيشتغل، وبيدرس ،وبيكمل ماجستير

وكمان بيغلس عليا

ههههههههههههههه

بس هو العاقل فينا في الشلة وبيفكر بالعقل

وهو من الاشخاص الي بيتكلم عادي وكل الناس حولي بيكونو واقعين من الضحك على كلامو

ينفع كومديان جامد جدا وعندو حركات وكلمات خاصة بي

مثل : لما نسمع فضل شاكر في اغنية يا غايب

يقوم قايل ها ها ها

او مثلا بيتكلم عن حاجة مش بحبها او مش طايقها يقوم قايل بواء


وحشني فايد، فايد لما عرفنا كان خاطب ودلوقتي ما شاء الله متجوز وعندو عيلين وربنا يكون في عونو عشان والدتو مريضة يا رب تقوم بالسلامة

فايد ابن مصر بجد ومجدع وبيضكنا جدا جدا حتى وائل الي هو ابو الضحك كلو لما يكون فايد معانا كلنا تلاقينا على الارض من كثر الضحك، عندو ذوق جامد في ترتيب البيت ولما تعوز تروح شوبينغ روح مع فايد


واحشني عماد الي مابيعملش حاجة الا باكل باكل

والمشكلة ان مش باين علي خالص اصلو رفيع واوقات بكون رفيع مع كرش وازاي دي بتحصل مش عارفة

لما نروح ناكل ونشبع يقوم قايل استنو ماحدش يرمي حاجة حرام

حاتو الاكل انا حاكلو

طب يابني مانت واكل معانا في اي

بس الف صحة علي بجد

على فكرة عماد شخص في غاية الحساسية وبحب والدتو جدا وبجد ربنا مايحرمهوش منها

وحشتني طنط اسماء، غاية في الحنية وطيبة والرقة

وسالي الطيبوبة العسولة الي كان نفسي اتعرف عليها من زمان

واخيرا الصيف الي فات اتعرفت عليها بنت مش زي اي بنت مصرية وهي الي خلتني اشوف الفرق بين البنت المصرية الي عايشة في مصر والبنت المصرية الي في الغربة

بنت ترفع راس مصر بأدبها واخلاقها وعاقلة جدا وعارفة هي عايزة اي ومعاها ومع عائلتها بحس نفسي وسط عيلتي واكثرومش بحس بغربة خالص

أما مها وبنتاها القروبة دانة

دانة دي بنت تاعبة مامتها جدا ولما اكون في البيت عندهم تيجي تحشر نفسها بيني وبين ميدو وزيما

والله البنت دي غريبة شكلها بتغار على خالها ميدو وزيما مع اني دايما بقولها يابنتي دول اصغر مني ب 3 و5 سنين

بس اكيد دي عايلة ومش بتتكلم وبتديني نظرة كدة فيها كره غريب

اقوم قايمة وداخلة المطبخ عند طنط اسماء


وحشني الحسين وعصير القصب ومسجد ست زينب، الحرنكش الي مش بحبو خالص وعصير المنجا في المقطم او كوب نسكافة جامد على الاربعة الصبح وانت بتشوف شروق الشمس في المقطم بينور مصر كلها

ياااااااااااااااااااااااه والهوا في شهر ياناير يكون بااااااااااااااااررررد جدا

وحشني سينما جلاكسي، النيل، فندق الحياة والطابق الاخير ومنظر النيل من هناك يجنن

وحشني ستارستيز والتابعي والدمياطي

وحشني كوك دور جدا والبطاطس بتاعتو وهارديز

وحشني الهرم واهلو بشوارعو الضيقة و البيوت القديمة والناس الي بتصلي في شوارعها في اول ايام العيد والبقر والجاموس والخواريف الي مالية المنطقة عشان تندبح وتتوزع ويعم الخير على الكل

والست الي كانت تصحينا من وش الصبح في العيد وهي بتنده على ابراهيم وبرضو بارهيم ماكنش بيرد عليها

هو في حد ينده على حد في ايام العيد الساعة 5 الصبح

ولا صوت بياع القوطة والكاز يا سلالالالالالالالالالالام

يا جدعان احنا طول اليوم صايعين في الشوارع هي ساعة الي عاوزين ننام فيها ارحموني

بس برضو بحب الهرم


وحشتني الدوشة وريحة البنزين الزفت

وحشتني طريق اسكندرية الصحراوي وسينما جود نيوز على الطريق

وحشني رن أواي وقهوتو

وحشني جنانا في افريكانو والقردة العبيطة حوالينا والاسد الي نايم وواخد حاجة مضروبة


واحشني لمتنى لما تخرب عربية فايد ونكون سبعة في عربية وائل


او لما نكون في عربيتين ونتجنن في شوارع مصر ونزنق بعض ونسرع


لما ناكل سينابون في العربية ومالية نفسي شوكولاتة ومالية كل الي حواليا كراميل


ويقوم وائل يقولي يا بنتي انت بتوكلي العربية كلها معاكي


ههههههههههههههههههه


على كدة مش حخلص خالص


حبقى اقولكم عن المغامرات بتاعت مصر في بوستات كثيرة


بس بجد واحشششششششششششاني يا مصر


ومش عارفة حيكون العيد دة عامل ازاي وانا بعيدة عنك :(


ملاحظة: الي ماسكة العلم دي ليمو:)

Thursday, December 6, 2007

تاج التفاؤل


اطيب قلب واجمل بنوتة في المدونات

الاسكندرانية الطحن هنودة بعتتلي تاج التفاؤل

بصراحة بقالي يومين بفكر بتفاءل امتى او لي

ولقيت اني بتفائل لما اصحى الصبح وافتكر اني حلمت في امي ربنا يرحمها

لما اتعصب واكون بايخة ودماغي زي الجزمة مع كدة الي بحبوني فاهمني

بتفائل لما الاقي ان لسة في ناس مش بتبيع نفسها حتى لو كانت محتاجة

ولما الدنيا تمطر والهوا البارد بيجري بيكون التفاؤل واصل الحد الاعلى

بتفائل لما انزل مصرواشوف اصحابي

بتفائل لما الاقي ناس شافتني مرة وحدة بس وبتتكلم عني كلام جميل

وبتفائل لما ناس بعرفها ونشتغل مع بعض والدنيا ترمينى في كل حتة ولما نرجع ونتجمع بيقولو " عارفة يا ليمو انت زي مانت ماتغيرتيش خالص" يابختك يا ريت نقدر نرجع زي زمان
بتفائل لما اكون مخنوقة ومضايقة من حد جدا واقول حسبي الله ونعم الوكيل واوكل امري لربنا وبعد ما تمر الايام الاقي بجد ربنا اخد حقي من اي حد ظلمني وبقول جوايا الحمد الله


يا رب كدة دايما يكون في تفاؤل
:)
في ناس مش بتحب حكاية التاج دة وعشان ما احرج من حد ولا حد يحرج مني يا جماعة التاج متوافر في الاسواق الليمونية للجميع
المكتئب والمتفائل والقرفان وطهئان واي نوع من انواع الاحاسيس الغريبة الي بنمر بيها :)
وفقة تفاؤل جميلة